உயர உயர பறந்தாலும் ஊர் "குருவி" பருந்தாகுமா..? : (அ+ஆ)^2

விஜய்க்கும் நடிப்பிற்கும் என்ன சம்பந்தம்மோ, அதே அளவு சம்பந்தம் தான் படத்தின் தலைப்பிற்கும் படத்திற்கும். அட தலைப்பில் எல்லாமா, குறை கண்டுப்பிடிப்பீங்க என்று முனுங்குகிறவர்களுக்கு ஒன்றை மட்டும் சொல்லிக் "கொல்ல" ஆசைப்படுகிறேன். இந்தப் படத்தில் நீங்கள் எங்கு கை வைத்தாலும் மாட்டுவது குறையன்றி, வேறில்லை.

இந்தப் படத்தைப் பற்றி, பத்தி பத்தியாக எழுதினால், உங்களுக்கும் பற்றிக் கொண்டு வரும் என்று தெரிந்ததால், தலைப்பிட்டு, சிறிய குறிப்புகளாக எழுதுகிறேன். கோவம் அளவை மீறிவிட்டால், தயவு செய்து, திரையயை உடைக்க வேண்டாம் என்று வேண்டுகோள் வைக்கிறேன்.

லட்சத்தில் ஒருவன்
திரைக்கதையில், தரணி கலக்குவார் என்று நம்பிப் போய் ஏமாந்த லட்சக்கணக்கான ரசிகர்களில் நானும் ஒருவன் என்பதால், நான் லட்சத்தில் ஒருவன் ஆகிவிட்டேன். இதற்காக இளைய தொளபதி விஜய்க்கு நன்றி.

கட்டுடைத்த காளை
படம் முழுக்க, விஜய், இயற்பியல் விதிகளை உடைத்தெறிகிறார். நீருக்குள் தூங்குகிறார். ஒரு இழுவை பந்துப் போல் தண்ணீர் மேல் நிற்கிறார். பறக்கிறார். ஒரு கிமி தூரத்திற்கு தாவுகிறார். 5 நிமிடத்திற்குள், 50 கிமியயை கடக்கீறார். இதுப் போன்ற பலவிதமான இயற்பியல் விதிகளை உடைத்தது, கட்டுடைத்தல் செய்ததால்,விஜய் இனிமேல் பிந விஜய் என்றழைக்கப்பட வேண்டும் என்பது என் அவா. (பிந பிநாயில் அல்ல.அல்ல...அல்ல). அவருக்கு மாறுவேடத் திலகம் என்று வேறு ஒரு பட்டம் கொடுக்கவும் திட்டமிருக்கிறது. முந்தைய படத்தில் மூன்று நாள் தாடி, இந்தப் படத்தில் இரண்டேமுக்கால் நாள் தாடி என்று பெரிய மாற்றம் செஞ்சதாலே, எனக்கே வித்தியாசம் தெரியமா, எப்போ, கதாநாயகன் எண்ட்ரி என்று டர்னா,டண்டனக்கா பாட்டின் போது கேட்டு, பின்னர், தெளிவுப் பெற்றேன். விஜயின் அறிவுரைகள் என்று ஒரு புத்தகம் போட நான் காத்துக்கிட்டு இருப்பது தெரிந்து, படத்தின் ஆரம்பத்திலே ஏகப்பட்ட அறிவுரைகள். நான் அதை எல்லாம், அப்படியே பொறுக்கி எடுத்து வைச்சியிருக்கேன். (குப்பையயை பொறுக்கத் தானே முடியும்)

திரைக்கதைச் செம்மல் தரணி
மோசடி வழக்கில் இவர் மீது வழக்கு பதிவு செய்ய வழியிருக்கிறதா என்று பலர் வழக்குரைஞ்ர்களிடம் கேட்பதாக செய்திகள் வருகிறதாம்.நல்ல திரைக்கதை அம்சமுள்ள படம் கொடுப்பார் என்று நம்பி ஏமாந்தவர்களின் செயல் இது என்று இன்னமும் நம்பாமல் தாடியயை சொறிகிறாராம் தரணி. அந்த கார் பந்தயம் (டப்பா வண்டியில் டர்போ வண்டிகளை முந்தி, சோழாவரம் போன்ற பந்தைய திடல்களை கேவலப்படுத்திய) போன்ற அருமையான காட்சிகளை சொன்னவர், விஜயின் அள்ளக்கையாக இருந்தாலும், சரி தரணியின் உதவியாளராக இருந்தாலும் சரி, அவர் வெகு விரைவில் ஒரு மசாலா திரைப்பட இயக்குனர் ஆகி நம்மை சோதிப்பார் என்பது மட்டும் இப்போதே சொல்லி வைக்கிறேன். கதாநாயகிக்கு ஒரு நல்ல அலுமினிய பாத்திரமாவது வாங்கி கொடுங்க தரணி ஐயா, படத்தில் தான் ஓட்டை உடைசலான பாத்திரமா தந்திட்டிங்க. ஒரு துண்டோட திரிஷாவை நிப்பாட்டினால், மக்கள் படம் பார்ப்பாங்க என்று நீங்களே நினைத்து அந்தக் காட்சியயை எடுத்திருந்தால், மன்னிக்கனும் தரணி, பொத்தென்று நீங்கள் எங்கள் மனதிலிருந்து விழுந்துவிட்டீர்கள். கில்லியுடன் ஒப்பிட்டு இந்தப் படத்தை டப்பா என்றுச் சொல்லவில்லை என்பதை யாரும் சொல்லாவிட்டாலும், நீங்களாகவே உணர்ந்தால் உங்களுக்கு இன்னும் சிந்திக்கும் மூளை இருக்கு என்று தட்டிக் கொடுத்துக்கொள்ளுங்கள்.

யாருங்க அது கலை இயக்குனர். வெப் கேமில், கடப்பாவையே, காட்டுறவரு. உலகம் எங்கெயோ போயிட்டுயிருகுதுங்கண்ணோவ். நீங்க இன்னும் வெப் கேமிலே உலகத்தை காட்டிக்கிட்டு இருக்கீங்க.

காமநெடி விவேக்
பெருச்சாளி வி(வ)காரங்களையும், டவுசர் காட்சிகளையும் விட்டு வெளியே வாங்க சின்னத்தனமான கலைவாணரே (கலைவாணர் எங்களை மன்னிக்கட்டும்). உங்களுக்கு எதிரி வடிவேலு அல்ல, நீங்களே தான் என்று எங்களுக்குத் தெரியும் உங்களுக்கு எப்போ புரியும்.

கிழிஞ்சுப் போன கிளிஷேக்கள்

-போட்டியில் நாயகன் வெற்றி பெறுகிறார். உடனே பாட்டு. "அத்தனைக்கும் மேல் நாம அண்ணன் தம்பிடா, நீ தான் என் தெய்வம் ".
-நாயகன் கதாநாயகியயை திட்டுகிறார். உடனே கற்பனை பாடல்.
-நாயகன் நாயகிக்கு அறிவுரை சொல்லுகிறார்
-அப்பா ரத்தம் பட்ட, கல்லிலே, குட்டி வில்லனை கொல்லுகிறார்.
-கதாநாயகனின் சேவையயை காவல் துறை ஏற்று, தண்டனைக் குறைப்பு செய்கிறது, பாராட்டுகிறது
-நாயகி நாயகனை அடையாளம் கண்டுப்பிடிப்பது இடையில் பிடிக்கும் போது மட்டுமே.



திரிஷா...லூசுஷா..
அஞ்சு நிமிடம் இடைவெளி கொடுத்தால், திரிஷா கணவு காணத் தொடங்குகிறார். அவுத்த வரை போதுமா, இன்னும் கொஞ்சம் வேண்டுமா என்று திரிஷாவும் கொஞ்ச நாளில் இறங்கிவிட்டார் போல் தெரிகிறது. நான் செத்துப் போவதுப் போல் நடிக்க மாட்டேன் என்று எல்லாம் வசனம் பேசும் பொண்ணு, இப்படி கேவலமா எல்லாம் நடிக்க மாட்டேன் என்று எப்போது சொல்லுமோ தெரியவில்லை. வழக்கம் போல அறிவுரைகளை கேட்டுக் கொண்டு லூசுத்தனமாக நடித்திருக்கிறார். ஓடுகிறார், ஓடுகிறார், கல்யாணியயை (பராசக்தி)விட அதிகமாக ஓடுகிறார். திரிஷா ஏன் ஒல்லியாக இருக்கிறார் என்பதன் ரகசியம் தெரிந்தது. விஜய் கூட இன்னும் இரண்டு படங்கள் நடித்தால், எலும்பு மட்டுமே மிஞ்சும்.

டவுசர் பாண்டி வில்லன்கள்
துள்ளாத மணம் துள்ளும் படத்தில் "பாரி" என்று ஒரு நடிகர் வருவார். ஆள் ஓமக்குச்சி போல் இருப்பார்,ஆனால் உதார் விடுவார். அதுப் போலத் தான் நம்ம குருவியயை எதிர்ப்பவர்களின் நிலை. என்ன, அவர்கள் ஓங்குதாங்காக இருந்தாலும், விஜயின் உத்வேகத்தின் முன் தூசியாகிவிடுகிறார்கள். விஜய் பேசாம ரங்க ராட்டினம் சுற்றலாம். எல்லரையும் காலைப் பிடித்து சுற்றி எறிகிறார். ஒலிபிக் தட்டெறிதல் போட்டிக்கு அனுப்பினா, எல்லா பதக்கமும் நமக்குத் தான். "ஒரு 100 பேர் சேர்ந்த அடிச்சா தான் இப்படி அடிப்படும்" என்று விஜய் கையால் அடிப்பட்ட சுமனைப் பார்க்கும் மருத்துவர் சொல்கிறார். ஏண்டா, 100 பேர் சேர்ந்தடிச்சா,செத்துப் போவாண்டா, பேக்குகளா என்று நாம் யாரும் அவங்களுக்கு சொல்ல முடியாது. அதனால், இன்னும் சில படங்களில் இதை நான் கேட்டுத் தான் ஆகனும்.
சுமன், ஆஷிஷ் வித்யார்த்தி, இன்னும் கொஞ்சம் சில்லறை தடியன்கள் என்று அத்தனை பேரும் விஜயின் ஆக்ரோஷ்த்தில் காலியாகிவிட்டனர். அடுத்தப்படத்தின் வில்லன்களையும் இப்பவே அடிச்சு சாய்ச்சிட்டார் விஜய், அடுத்தப் படத்திற்கு வில்லன் கிடைக்காமல் அல்லாடுறாங்களாம்.

கதை..வெந்த கதை

பழி வாங்கும் கதை என்று யாராச்சும் சொல்லியிருந்தா அது தவறு. மக்களுக்காக, விஜய் பிறந்த கதை என்பதே சரி.

இந்தப் படத்தை விமர்சிப்பதன் மூலம் , நான் எப்பேர்ப்பட்ட மொக்கைக்கும் விமர்சனம் எழுதத் தெரிந்தவன் என்ற நிலையயை அடைந்தவிட்டவன் என்று நீங்கள் அனைவரும் நினைத்தால், அதற்கு நான் பொறுப்பாக மாட்டேன்.

ஊர் சுற்ற வந்த கோவியரை குடும்பத்துடன், நள்ளிரவு 12.00 மணிக் காட்சிக்கு இழுத்துச் சென்று இம்சித்ததற்கு, இந்தப் பதிவின் மூலம் என் ஆழ்ந்த வருத்தத்தை தெரிவித்துக் கொள்கிறேன்.