நானும் வள்ளலார் தான்..........

வள்ளலார் ஒளி வடிவத்தை வணங்கினாராம். கண்ணாடியில் அவர் முகம் பார்த்தாலும், முகம் தெரியாதாம், ஒளி தான் தெரியுமாம். அவர் சமாதி அடைந்தப் போதுக் கூட, ஒளியில் கலந்தாராம். அதெல்லாம் சரி, என்னை ஏன் வள்ளலார் என்றுச் சொன்னேன் என்று வினவுகிறீர்களா...??? அவசரம் வேண்டாம்..பொறுமையாக படியுங்க..புரியும்.

இப்போதைய புதுக்கொள்கையாக படம் பார்க்காமல், விமர்சனங்களையோ, அல்லது, அதுக்குறித்தான கருத்துக்களையோ படிப்பதில்லை என்று கடைப்பிடித்ததால், தசாவதாரம் பற்றிய பதிவுகளை நான் படிக்க வில்லை. ஆனால், இந்தப் பதிவிற்கும் ஏற்கனவே வந்த சில பதிவுகளுக்கும் ஒற்றுமைகள் இருந்தால், அது எதேச்சையானதே.

படத்தில் முன்னரே குறிப்பிட்டதுப் போல், 12ஆம் நூற்றாண்டைக் காட்டும் போது, அனைவருமே, கிட்டத்தட்ட அனைவருமே,முப்புரிநூலுடன் திரிவது காட்சிப்பிழை. ரங்கராஜ பெருமாளை கடலில் வீசும் முன் வரும் காட்சியில் சில குடியானவர்களைக் காட்டுகிறார்கள், மற்றபடி,எல்லாம் அரை மண்டைகளும், கொட்டை தாங்கிகளும் மட்டுமே, சோழர் காலத்தில் வாழ்ந்ததாக தெரிகிறது. ரங்கராஜ நம்பியாக, கமல் நச்சென்றூ பொருந்துகிறார். ஓம் என்றூ முழங்கும் போது, நமக்கும் அதிருகிறது..( அட இதுவும் தமிழ் இல்லையா என்று..ஓம் என்ற பிரனவ மந்திரத்தை முருகன் தந்தைக்கு அருளியதாக சொல்வது, முருகனை ஆரியக்குடும்பத்தில் சேர்க்க மட்டுமே என்று எங்கோ படித்ததாக நினைவு..)

படத்தில் கிராபிக்ஸ் செய்தால் அது கிராபிக்ஸ் என்று தெரியாத வண்ணம் செய்தால் நன்றாக இருக்கும். ஆனால், சமீப கால படங்களில் அது கிராபிக்ஸ் என்றூ தெரியும் வண்ணமே, அதன் தரம் இருக்கின்றது. உதாரணம். தில்லை சிதம்பரம் கோவிலை, கானொளிக்கருவி கிழிருந்து மேல் போய், பின் மேலிருந்து கீழ் போகின்றது. கற்கோபுரம் கிராபிக்ஸ் என்று சிறுப்பிள்ளைக் கூட சொல்லும் வண்ணம் இருக்கின்றது. நெப்போலியன்,சோழன் பாத்திரத்தில் நிறைவாக செய்திருக்கிறார்.

படத்தின் ஆரம்பத்திலேயே, கமல் பகுத்தறியும் என்று பேச்சை ஆரம்பிக்கின்றார். ஆனால், படம் பார்த்து முடிக்கும் சாமனியனுக்கு, பகுத்தறிவை போதிக்கின்ற படம் என்று கடைசி வரை தெரியாதவாறும் பார்த்துக்கொள்கிறார். இன்னும் சொல்லப் போனால், சில கிறுக்குகள், கடவுளின் இருப்பை உறுதிப்படுத்தும் படம் என்றே சொல்லிக் கொள்ளக் கூடும்.

உயிர்க்கொல்லும் கிருமிகளைக் கண்டுப்பிடிக்கும் விஞ்ஞானியாக வரும் கமல் வழக்கம் போல், நாம் பல படத்தில் பார்த்த, ரசித்த, வசனத்தில் நகைச்சுவை செய்யும் கமல். சொல்லவே வேண்டாம், பாத்திரத்தின் தன்மைக்கு ஏற்றவாறு வளைந்து நெளிந்து, குழம்பி தவிக்கிறார். ரங்கராஜரை கதையில் நுழைத்ததாலோ என்னவோ, கதாப்பாத்திரங்களில் பேர்களில் எல்லாம், ஒரே வைணவ வாடை. விஞ்ஞானி கமல் - கோவிந்த், ரா அமைப்பு அதிகாரி- பல்ராம் நாயுடு, அசின் - ஆண்டாள், பாட்டி (கமல்)- கிருஷ்னவேணி, பாடகர்-அவதார் சிங்..(அவதாராம், தசாவதாராம், வைணவம்...)

கமலுக்கு இந்த ஐயங்கார் கதாப்பாத்திரங்களை செய்வதில் அலாதி ஆசை போல் இருக்கின்றது. மைக்கேல் மதனக்காமராஜன், மீண்டும் கோகிலா, ஹே ராம்...என்று பட்டியல் தொடரும். கமல் விரும்பி செய்கின்றாரா என்ற குழப்பம் எனக்கு இருக்கின்றது. எல்லாரையும் அரவனைக்க வேண்டும் என்று சொல்லும் கமல் ஒரு சாதி வட்டத்துக்குள்ளே சிக்கி சீரழிவது எனக்கு வருத்தமே.

அடுத்தடுத்து தொடர்புடைய நிகழ்ச்சிகளை அடுக்கி வைத்து, சுவாரசியம் குறையாமல், நம்மை இழுத்துச் செல்வதில் திரைக்கதை ஆசிரியராக கமல் அசத்துகிறார். இதுப்போன்ற, 5 நாளுக்குள் நடக்கும் கதைகள் தமிழ் திரையில் அரிதாகவே காணப்படும். சும்மா, எடுத்தால், 25-50 வருடக் கதையயை அநாயசமாக எடுத்து, குப்பைப் படமாக வழங்கும் கே.எஸ்.ரவியயை இழுத்து வந்த கமல் பாராட்டுக்குரியவர்.

ஒவ்வொரு வேடத்திலும் நாம் பார்த்து முகம் சுளித்த பழைய சதை தொங்கும் வேடமேற்றி நடித்திருகிறார். அதுத் தேவையா என்றூ ஒரு நிமிடம் யோசித்தேன்.கதையில் கமலே எல்லா வேடமேற்றூ நடிப்பதால், கமல் எல்லாக் காட்சியிலும் வர முடிகின்றது. அதைத் தானே நமது நாயகர்கள் அனைவருமே விரும்புகிறார்கள். அசினுக்குப் பதிலாகவும் கமலே கதாநாயகி வேடமேற்றுயிருக்கலாம். ( எப்படியும் முத்தக் காட்சி இல்லை இதில்..அப்பறம் என்ன....:P )

அகதாநாயகன் வேடத்தில் நடிக்க கமலுக்கு ஆசைப் போலும், இதில் அதை நிறைவு செய்துக் கொண்டியிருக்கிறார். நிறைவான நடிப்பு, என்னக் கொஞ்சம் டெர்மினேட்டர் நினைவுக்கு வருவதை தவிர்க்க முடியவில்லை. ஆனால், கிட்டத்தட்ட வெள்ளைக்காரன் என்று நம்பும்படியான நடிப்பு. அசாகயமாக அடிக்கிறார், அடிவாங்குகிறார், குதிக்கிறார், தவ்வுகிறார் இன்னும் என்ன என்னமோ பண்ணுகிறார். என்னைக் கவரும் அவதாரங்களில் அவரும் ஒருவர்.

விண்செண்ட் பூவராகன் என்று என்று எந்த தலித் போராளி பெயர் வைத்திருக்கிறார் என்றுத் தெரியவில்லை. அதேப் போல், தொந்தியும் தொப்பையுமாக, ஒரு போராளியயை அடையாளப்படுத்தியதும் ஏன் என்றும் புரியவில்லை. திருநெல்வேலி வட்டார மொழி பேசியபடி, தில்லை/புதுவைக்கருகே ஒரு போராளியா. ஏதோ ஒரு வட்டார மொழி பேச வேண்டும் என்பதற்காக இப்படியா. எல்லா அவதாரங்களும் உயிருடன் மிஞ்ச, ஒரு தலித் அவதாரம் தான் சாகடிக்கப்பட வேண்டுமா என்றக் கேள்வி எழும்புகிறது. எத்தனைக் காலம் தான் இப்படி தியாகிவே இருக்க வேண்டும்.

ஆத்திகவியாதிகள்(வாதிகள்) வழக்கமாக பாடும் பாடல், எல்லாம் அவன் செயல். அவனின்றி ஒரு அனுவும் அசையாது என்று. அது சாத்தியமே இல்லாத ஒன்று என்று பகவானே (அப்படி ஒருவர் இருந்தால் ) வந்துச் சொன்னாலும், அவர்கள் நம்பப் போவதில்லை. ஆனால், வாழ்க்கையில் 90% செயல்பாடுகள் நம் கையில் இல்லை. நம்மைச் சுற்றி நடக்கும் நிகழ்வுகள் விந்தையாக, அடுக்கடுக்காக நிகழ்ந்து, ஒரு நல்ல நிகழ்வோ, கெட்ட நிகழ்வோ நடக்கின்றது. நல்ல நிகழ்வு என்றால், இறைவனைக் கொண்டாடுவதும், கெட்ட நிகழ்வு என்றால், விதியயைப் பழிப்பதும் தான் இவர்களின் வழக்கம். இந்தப் படத்தில், இப்படி அடுக்கடுக்காக நடக்கின்ற நிகழ்வுகளில், இந்த 12ஆம் நூற்றாண்டைச் சேர்ந்த கதை மட்டும், ஒட்டாமல், தள்ளி நிற்கின்றது. அதைப் பிய்த்துப் போட்டால், படத்தின் ஓட்டத்தில் எந்த மாற்றமும் இல்லை.

நானும் ஏதேதோ யோசித்துப் பார்த்தேன், அந்தக் கட்டம் படத்தில் வருவதற்கு கமலின் சரித்திர பட ஆசை தவிர வேற எதுவுமே இருக்க முடியாது என்று சமாதானம் செய்துக் கொண்டேன். அது சரி கமலின் படங்கள் எல்லாமே அவரின் ஆசையின் விளைவு தானே.. :P. அந்த ரங்க ராஜன் நம்பி, அரசனையே, எதிர்க்கும் நெஞ்சுரம் உள்ளவராகவும் காட்ட இப்படி காட்டுத்தனமான உடம்பைக் காட்ட வேண்டுமா. கோவிலில் மணியாட்டுபவர்களின் உருவமைப்பு எப்படி இருக்குமென்று கமல் பார்த்ததில்லையா.

பல்ராம் நாயுடு கதாப்பாத்திரத்தில் கமல் மிகையில்லாமல், நடித்து வயிற்றை புண்ணாக்குகிறார். ஆனால், ரா உளவுப் பிரிவு அதிகாரி, இப்படி, வானூர்தியில் தொங்கியபடியே வருவார் என்பது ஜீரணிக்க முடியாத வண்ணம் இருக்கின்றது. ஜப்பானிய யூகாவின் அண்ணனாக வரும் கமலுக்கு உண்மை எப்படி விளங்குகிறது என்பது விளக்கப்படவில்லை.ஒரு வேளை ரங்கராஜர் ஓவர் டைம் பார்த்து கணவில் சொன்னார் போல் தெரிகின்றது.

கதாநாயகன் வயது சுமார், 30க்குள் இருக்கும் என்று வைத்துக்கொள்வோம்..திருமணம் ஆகதவர் என்பது அதை இன்னும் உறுதிப்படுத்துகிறது.அப்ப அவருடைய அப்பாவின் தலைமுறை 1950கள் என்றுக் கொண்டாலும், அந்த தலைமுறையில் சாதிப் பெயருடன் பெயர் சொல்லுவதை நிறுத்தியாயிற்று. (மறுப்பவர்கள் விளக்கம் சொல்லனும்ன்னேன்..) பின்னே, என்ன விளக்கெண்ணெய் தனத்திற்கு தன்னுடைய தகப்பனாரின் பெயர், ராமசாமி நாயக்கர் என்று வைக்கனும், அதில் அவரை அசின் வாயால் வசைப்பாட வைக்கனும். கமல் இரண்டுங்க்கெட்டாந்தனமாக படம் எடுப்பதை நிறுத்தினால் தேவலம். ஆற்றில் ஒரு கால், சேற்றில் ஒரு கால் வைப்பதால் யாருக்குத் தான் என்ன லாபம்.

படத்தின் முடிவிற்கு முன்னால் கமல் சொல்லும் வசனம் ."கடவுள் இல்லையென்று நான் எப்போ சொன்னேன்..அப்படி ஒருவர் இருந்தால் நல்லா இருக்கும் என்று தானே சொன்னேன்"..நல்லா எழுதுறாரய்யா....உலக நாயகன்...

படத்தின் இறுதியில் அந்த கமர்ஷியல் பாட்டு தேவையா...உலக நாயகனே என்று...மீண்டும் ஆற்றில்......(நிரப்பிக் கொல்லவும்..)

ஆக மொத்தம், தசாவதாரம் சுவாரசியமான படம்..ஆனால், உலகத்தரமல்ல.

நிற்க....

தமிழிலும் தெலுங்கிலும் "கல்லை மட்டும் கண்டால்" பாடலில் "பல்லாயிரத்தாண்டு" ஒலிக்கும் பகுதி தமிழிலேயும், ஹிந்தியில் மட்டும் "தேவ மொழி" ஒலிப்பது ஏனோ. கமலுக்கே வெளிச்சம்

பி.கு:-

எல்லாரும் தசாவதாரம் பற்றி எழுதி ஒளியில் ஐக்கியமாகச் சொன்னார்கள், இப்ப இந்தப் பதிவை எழுதுவதன் மூலம், நான் ஒளியில் ஐக்கியமாகிவிட்டேனே..அப்ப நானும் வள்ளலார் போல் தானே..